Fakamafuliga ki te iloiloga o tupe togi ne tino nofo faopoopo (board)

Akutuga o fakamafuliga

Mai i te po 2 o Mati 2026, a togi katoa mai tino nofo faopoopo e maua ne koe ka fakaaofia manafai matou e:

• galue me e fia a tupe fesoasoani e mafai o maua ne koe ki te togi o tou fale nofo (pela mo te Accommodation Supplement io me ko te Temporary Additional Support), pela foki te
• galue me e fia te tupe ka togi ne koe ki te Income Related Rent (IRR) tela ko te togi o te fale e galue ki tau tupe maua i te fale ausigi.

I te vaitaimi nei a matou e aofia fua ko tupe togi mai tino nofo faopoopo kola e toko 3 io me silia atu (vagana iei tena loa tau tupe lasi e maua).

Te fakamafuliga tenei ko tena uiga e mafai o foliki tau tupe e maua o fesoasoani ki te togi o tou fale, io me lasi tau tupe togi i te Income Related Rent.

E fuli foki ne matou te galuega me pefea te aofaki o togi mai tino nofo faopoopo ki te lauga o tupe maua. Ko tena uiga i nisi tulaga e mafai o aofia se vaega o tupe togi mai tino nofo faopoopo e pela me se tupe maua.

Tupe togi mai tino nofo faopoopo e mafai ne:

• togi tupe mo te nofo e pela foki mo meakai, i se tulaga e se mafai o fakamavae a meakai mai tau tupe ne togi. e mafai foki o aofia a nisi fesoasoani, pela mo te iti, io me ko
• tupe togi mai se tino e nofo i te fale ausigi ki tino tela e seai sena igoa i te feagaiga o nofo i te fale kae e se ko te soa fakatauavaga a te tino e isi sena igoa i te feagaiga io me se tamaliki koi nofo faka‘na.

A matou e ‘tae a fakamatalaga o tupe e togi ne tino nofo faopoopo i te fale mai te masina o Aokuso 2025. Te mea nei e fai ke maua ne matou a fakamatalaga e manakogina ne matou ke faka‘tonu a tupe e togi ki tino mai te po 2 o Mati 2026.

‘Taega o fakamatalaga o togi mai tino nofo faopoopo i te fale

Mai ia Aokuso 2025, ka avatu ne matou se meli iti io me se tusi ki nisi tino kola e maua ne latou se fesoasoani ki mea tau fale mai ia matou io me e nofo i se fale ausigi. 

Fesoasoani i feitu tau fale e aofia: 

• Accommodation Supplement (Fesoasoani ki te togi o te fale nofo)
• Temporary Additional Support (Fesoasoani Faopoopo E Se Tumau)
• Specific Benefit (Penefiti Fakapitoa)
• Penefiti o fesoasoani ki te togi o te fale fakapitoa ki tino akoga e tokotasi kae isi ne ana tamaliki, kae
• Away from Home Allowance (Alauenisi Ki Tino E Mao Mai Olotou Koga Nofo Masani).

Kafai e maua ne koe ne tupe mai tino nofo faopoopo, ka mafai ne koe o fakailoa mai ki a matou i te initaneti e auala i te MyMSD io me fakafonu se laupepa foomu.

Fakamatalaga e ‘tae ne matou

Matou ka sili atu ki tou:

• igoa mo te fakatuatusi
• fakamatalaga ki togi o te fale nofo
• te igoa o te tino nofo faopoopo
• te asofanau o te tino nofo faopoopo, manafai e iloa
• fesokotakiga o te tino nofo faopoopo, mo te
• aofaki tupe e togi ne te tino nofo faopoopo.

Fakamatalaga ka tausi ne matou e uiga mo tino nofo faopoopo kola e se ko tino e onoono matou ki ei

Kafai te tino nofo faopoopo e se koia se tino e onoono matou ki ei, ka mutana a fakamatalaga e tausi ne matou e uiga mo latou. Ka fakamau ne matou olotou igoa, te mataimanu muamua o te olotou igoa fakaoti mo te aofaki tupe e togi atu ne latou mo te olotou nofo.

Te mea nei ka fai ke faigofie ki a koe o fakailoa mai ki a matou me kooi a tino i tou kaufale mo te tupe e maua ne koe mai tino e nofo faopoopo.

Ka aasi ne matou me e ‘pau te aofaki o tupe ne togi ne tino nofo faopoopo

Kafai tau tino nofo faopoopo e maua ne ia se tupe fesoasoani tau fale nofo mai ia matou, ka aasi ne matou manafai te tupe ne togi atu ne te tino nofo faopoopo ne fakailoa mai ne koe e ‘pau mo te aofaki ne fakailoa mai ne te tino nofo faopoopo ki a matou me ne togi atu ne latou.

Kafai te aofaki e se fetaui, ka mafai o sokotaki atu matou ki a koe pela foki te tino nofo faopoopo ke fakamautinoa te aofaki sao.

Kafai e togi ne koe a tou nofo a ko te togi o tou nofo ne fai mai ne koe ki a matou e mafuli ona ko te faka‘pauga ne fai ne matou, e mafai o pokotia tau tupe fesoasoani e maua ki mea tau fale.

Ka fakailoa atu ne matou me e fia tau tupe ka togi i te kamataga o te sua tausaga

Kafai e maua ne koe togi mai tino nofo faopoopo i te fale, ka aasi ne matou au tupe e togitogi kae fakailoa atu ne matou ia Ianuali/Fepuali 2026 me se a tau aofaki foou ka togi (manafai e mafuli).

Au mea e togitogi ka se mafuli ke oko ki a Mati 2026.

Ka fai ne matou a fakamafuliga ki tupe togitogi mai ia Mati 2026

Kafai e maua ne koe tupe mai tino nofo faopoopo i se fale:

• e mafai o tai foliki te tupe e togi atu mo fesoasoani ki te fale. Kafai e tena, ka fakagalue te mea tenei mai i te po 2 o Mati 2026.
• e mafai o lasi atu tau mea e togi ki te Income Related Rent. Kafai e tena, ka fakagalue te mea nei mai tua o te po 2 o Mati 2026, e mafai o fai mai te sua iloiloga o te togitogi fakatausaga o tou nofo i te fale io me ko isi se mafuliga i tou tulaga.

Kaia ko fai iei a fakamafuliga konei

Te fakamafuliga tenei ne fakapula e pela me se vaega o te Fakatautauga Tupe 2024. E fakafoliki ne ia te pokotia o te MSD o tapolopolo te togi o se aofaki tupe o fesoasoani ki se manakoga loa e tasi tau te fale. Tena uiga, te tino i te fale (io me ko te tino io ia te fale) mo te tino nofo faopoopo e maua ne laua fakatasi a te fesoasoani i mea tau fale mo togi te manakoga e tasi i te fale. 

E fakapogai foki o fakatoka te se faka‘pau o faifaiga ki tino e togi olotou nofo i se fale (renters) mo tino nofo faopoopo manafai ko galue me e fia e mafai ne koe o maua o fesoasoani ki tau fale e pela foki me e fia e togi ne koe manafai ko nofo koe i se fale ausigi.  

Fakamatalaga o fakamafuliga konei

Filifili te fakatomuaga e taugatonu mai lalo ke iloa a fakamatalaga o fakamafuliga.

Tupe Fesoasoani I Mea Tau Fale

Kafai e galue matou ki tupe fesoasoani ki te mea tau fale, e tasi o mea e onoono matou kiei ko te isi io me seai ne tupe e maua ne koe mai tino nofo faopoopo.

I te vaitaimi nei a matou e aofia fua ko tupe togi mai tino nofo faopoopo kola se toko 3 io me silia atu i loto i te faopoopoga (vagana iei tena loa tau tupe maua lasi).

Mai i te po 2 o Mati 2026, ka aofia ne matou e 62% o tupe maua mai tino nofo faopoopo ki loto i te faopoopoga (te sua 38% e se aofia me e lavea ne matou me fakaoga ki meakai mo nisi fesoasoani). Ko tena uiga e mafai o foliki tau mea e maua mai te tupe fesoasoani ki mea tau fale, me e matea ne matou a tupe togi mai tino katoa nofo faopoopo e togi foki se vaega o te nofo o latou.

Fesoasoani i mea tau fale e aofia:

• Accommodation Supplement (Fesoasoani ki te togi o te fale nofo)
• Temporary Additional Support (Fesoasoani Faopoopo E Se Tumau)
• Specific Benefit (Penefiti Fakapitoa)
• Penefiti o fesoasoani ki te togi o te fale fakapitoa ki tino akoga e tokotasi kae isi ne ana tamaliki, kae
• Away from Home Allowance (Alauenisi Ki Tino E Mao Mai Olotou Koga Nofo Masani).

E fakatusa penei

Kingi e togi e $600 i te vaiaso i tena fale nofo (rent). E 2 a tino nofo faopoopo kola e togi kiei e $150 kae $200 i te vaiaso.

Nei, e se aofia ne tatou a togi mai tino muamua e toko 2 e nofo faopoopo i te iloiloga o te aofaki tau te fale nofo. Ko tena uiga a ia ka togi e $600 i togi o mea tau te fale nofo.

Mai i te po 2 o Mati 2026, ka onoono matou ki tupe katoa e maua mai tino nofo faopoopo.

• Ka tuku fakatasi ne matou a tupe maua mai tino katoa e nofo faopoopo ($150 + $200 = $350).
• Ka galue ne matou e 62% o te aofai katoa mai tino nofo faopoopo, tela ko te $217.
• Ka tuku ifo ne matou te aofaki e togi i te fale nofo i te aofaki tena ($600 toese $217 ko $383).
• Kingi ka togi e $383 i te vaiaso i togi tau te fale nofo.
• Ona la ko Kingi ko fanaifo a togi tau te fale mai te $600 ki te $383, ka mafai o fanaifo tena tupe fesoasoani e maua ki mea tau fale.

Te galuega o te Income Related Rent

Te galuega o te Income Related Rent (IRR), e galue ne matou a te tupe maua a tino e nofo i te fale i te vaiaso. Nei, a matou e lau ne matou a tupe maua mai tino nofo faopoopo e pela me ne tupe maua manafai:

• a latou ko au tino tonu e maua mai iei te tupe maua (e fakaoga ne matou te aofaki katoa e maua ne koe i vaiaso taki tasi e pela me ko tau tupe maua i te vaiaso), io me
• e maua au tupe mai se toko 3 io me silia atu o tino e nofo faopoopo (e se aofia ne matou te toko 2 tino nofo faopoopo e maluga la tupe e togi atu kae e fakaoga fua e 62% ke faopoopo ki te aofaki o au tupe maua i te vaiaso).

Te galuega o tau tupe e togitogi ki te nofo i te fale (https://www.workandincome.govt.nz/housing/live-in-home/live-in-public-housing/calculating-rent-payments.html)

Mai te po 2 o Mati 2026, ka aofia ne matou e 62% o tupe e maua ne koe e togi atu ne tino nofo faopoopo kae faopoopo ki loto manafai ko galue te aofaki o te IRR e manakogina ke togi ne koe. Ko tena uiga e mafai o uke atu tau mea e togi ki te IRR.

Kafai te IRR aofaki e galue ne matou e silia atu ki te aofaki o te togi o te fale i te maketi mo te fale tena, ka togi fua ne koe te aofaki togi tela i te maketi.

So se fakamafuliga ki tau Income Related Rent ka fakagalue mai tua o te po 2 o Mati 2026, e mafai mai:

• tau sua iloiloga fakatausaga o te togi o te fale, io me
• manafai ko isi se mafuliga ki tou tulaga.

Fakatusaga mai te po 2 o Mati 2026

Vanessa e nofo i se fale ausigi kae e togi tena IRR e $400 i te vaiaso. E 2 a tino e nofo faopoopo kola e togi kiei e $150 mo te $250 i te vaiaso.

Tela la mai te po 2 o Mati 2026 a matou ka:

• tuku fakatasi ne matou a tupe maua ma tino katoa e nofo faopoopo ($150 + $250 = $400), kae
• galue te 62% o te aofaki katoa ne togi ne tino nofo faopoopo, tela e $248.

Ka faopoopo ne matou te aofaki tenei ki te galuega o tena Income Related Rent. Ko tena uiga te IRR ka fanaka mai te $400 ki te $648.

Kafai te IRR e togi e silia atu ki te togi o te fale i te tinaa maketi, ka togi fua ne ia te togi o te fale tela e pau mo te maketi.

Kafai au tupe maua mai tino nofo faopoopo e lau pela me ne tupe maua

Konei taimi a nisi o tupe maua mai tino nofo faopoopo e maua ne koe e mafai o lau e pela me ne tupe maua ke fakaoga ki te lasiga o mea e togi kola e maua ne koe mai ia matou.

E mafai te 62% o te aofaki katoa ne maua mai tino nofo faopoopo e silia atu i au mea e togi tau te koga nofo. Kafai e tena, te aofaki tela e silia ka lau e pela me se tupe maua ki te lasiga o mea e togi e maua ne koe mai ia matou, vagana koe e nofo i se fale ausigi.

Kafai e nofo koe i se fale ausigi, e aasi ne matou manafai te 62% o te aofaki katoa ne maua ne koe mai tino nofo faopoopo e silia atu ki te maketi i togi o fale. Kafai e tena, te aofaki e silia ka lau e pela me se tupe maua ki te lasiga o mea e togi e maua ne koe mai ia matou.

E fakatusa penei - se nofo i se fale ausigi

A togi o mea tau te fale e $300 i te vaiaso. E 2 a tino nofo faopoopo ia koe kae maua se aofaki mai togi mai tino nofo faopoopo e $600 i te vaiaso. 62% o te togi katoa mai tino nofo faopoopo e maua ne koe e $372. Te tupe e silia e $72.

Ko tena uiga te $72 e lau e pela me se tupe maua mo te lasiga o mea e togi e maua ne koe mai ia matou.

Fakatusa penei - e nofo i te fale ausigi

A koe e nofo i se fale ausigi a ko te togi o te fale i te maketi e $500 i te vaiaso. E toko 3 a tino e nofo faopoopo ia koe kae e maua te aofaki katoa mai tupe togi a tino nofo faopoopo e $900 i te vaiaso. 62% o te aofaki katoa ne maua ne koe mai togi o tino nofo faopoopo e $558. Te tupe e silia e $58.

Ko tena uiga te $58 e lau e pela me se tupe maua mo te lasiga o mea e togi e maua ne koe mai ia matou.