ការផ្លាស់ប្តូររបៀបវាយតម្លៃលើការបង់ថ្លៃស្នាក់នៅ

ចាប់ពីថ្ងៃទី 2 ខែមីនា ឆ្នាំ 2026 តទៅ រាល់ប្រាក់ដែលអ្នកបានទទួលសម្រាប់ថ្លៃស្នាក់នៅ នឹងត្រូវ​បានរួមបញ្ចូល នៅពេលដែលយើងខ្ញុំ ៖

• គណនាថាតើអ្នកអាចទទួលបានប៉ុន្មានចំពោះប្រាក់ឧបត្ថម្ភគេហកិច្ច (ឧ. ប្រាក់បង្គ្រប់​សម្រាប់​បង់ថ្លៃស្នាក់នៅ ឬជំនួយបន្ថែមបណ្តោះអាសន្ន) និង
• គណនាថ្លៃជួលផ្ទះដែលអ្នកត្រូវបង់ សម្រាប់ចំណូលពាក់ព័ន្ធនឹងការជួលផ្ទះ (IRR) នៅ​ក្នុង​លំនៅដ្ឋានសាធារណៈ ។

បច្ចុប្បន្ននេះ យើងខ្ញុំ ដាក់បញ្ចូលតែប្រាក់ថ្លៃស្នាក់នៅដែលអ្នកទទួលបានពីអ្នកស្នាក់នៅចំនួន 3 នាក់ ឬច្រើនជាងនេះប៉ុណ្ណោះ (លើកលែងតែនេះ គឺជាប្រភពចំណូលចម្បងរបស់អ្នក) ។

ការផ្លាស់ប្តូរនេះ មានន័យថា អ្នកអាចទទួលបានប្រាក់ឧបតម្ថម្ភសម្រាប់គេហកិច្ចរបស់អ្នក​ក្នុង​ចំនួន​តិចជាងមុន ឬបង់ច្រើនជាងមុន សម្រាប់ចំណូលដែលទាក់ទងនឹងថ្លៃជួលផ្ទះ ។

យើងខ្ញុំ ក៏កំពុងធ្វើការផ្លាស់ប្តូររបៀបដែលយើងគណនាថ្លៃស្នាក់នៅដែលត្រូវបានរាប់បញ្ចូលជា​ប្រាក់​ចំណូលផងដែរ ។ ត្រង់នេះគឺមានន័យថា នៅក្នុងស្ថានភាពខ្លះ ផ្នែកនៃប្រាក់ដែល​អ្នកបាន​ទទួល​ពីការបង់ថ្លៃស្នាក់នៅ អាចត្រូវបានរាប់ជាប្រាក់ចំណូល ។

ប្រាក់ដែលបានទទួលពីការបង់ថ្លៃស្នាក់នៅអាចជា ៖

• ប្រាក់ថ្លៃស្នាក់នៅ និងប្រាក់ថ្លៃអាហារ ដែលថ្លៃអាហារ គឺពិបាកញែកចេញពីប្រាក់​ដែល​អ្នក​បង់ ។ ប្រាក់នេះ ក៏អាចរួមបញ្ចូលថ្លៃសេវាកម្មផ្សេងទៀតផងដែរ ដូចជា ថ្លៃភ្លើង ឬ
• ប្រាក់ដែលបង់ដោយនរណាម្នាក់ដែលរស់នៅក្នុងលំនៅដ្ឋានសាធារណៈ ដែលមិនមាននៅ​ក្នុង​កិច្ចព្រមព្រៀងជួល ហើយមិនមែនជាដៃគូរបស់អ្នកជួល ឬកូននៅក្នុងបន្ទុក ។

យើងខ្ញុំ​កំពុងធ្វើការ​ប្រមូល​ព័ត៌មាន​ការបង់ប្រាក់ថ្លៃស្នាក់នៅ​ចាប់ពី​ខែ​សីហា ឆ្នាំ 2025 ។ ការធ្វើបែប​នេះ គឺដើម្បីឲ្យយើងខ្ញុំ មានព័ត៌មានដែលត្រូវការ សម្រាប់បើកប្រាក់ឲ្យអ្នកទទួលឲ្យបានត្រឹមត្រូវ ចាប់​ពី​ថ្ងៃទី 2 ខែមីនា ឆ្នាំ 2026 ។

ការប្រមូលព័ត៌មានការបង់ប្រាក់ថ្លៃស្នាក់នៅ

ចាប់ពីខែសីហា ឆ្នាំ 2025 តទៅ យើងខ្ញុំ នឹងផ្ញើអ៊ីមែល ឬសំបុត្រទៅកាន់មនុស្សមួយចំនួន ដែល​ទទួលបានប្រាក់ឧបត្ថម្ភគេហកិច្ច ពីយើងខ្ញុំ ឬអ្នកដែលរស់នៅក្នុងលំនៅដ្ឋានសាធារណៈ ។ 

ប្រាក់ឧបត្ថម្ភគេហកិច្ច រួមបញ្ចូលនូវ ៖ 

• ប្រាក់បង្គ្រប់សម្រាប់ថ្លៃស្នាក់នៅ
• ជំនួយបន្ថែមបណ្តោះអាសន្ន
• អត្ថប្រយោជន៍ពិសេស
• អត្ថប្រយោជន៍ស្នាក់នៅ សម្រាប់និស្សិតដែលជាឪពុក/ម្តាយតែឯង និង
• ប្រាក់ជំនួយសម្រាប់ការរស់នៅឆ្ងាយពីផ្ទះ ។

ប្រសិនបើអ្នកទទួលបានប្រាក់ថ្លៃស្នាក់នៅ អ្នកនឹងអាចប្រាប់យើងខ្ញុំបានអំពីរឿងនេះតាមអនឡាញ តាម​រយៈ MyMSD ឬដោយការបំពេញទម្រង់ជាក្រដាស ។

ព័ត៌មានដែលយើងនឹងប្រមូល

យើងខ្ញុំនឹងសុំព័ត៌មានរបស់អ្នក ដូចជា ៖

• ឈ្មោះ និងអាសយដ្ឋាន
• ព័ត៌មានអំពីថ្លៃស្នាក់នៅ
• ឈ្មោះអ្នកស្នាក់នៅ
• ថ្ងៃ ខែឆ្នាំកំណើតអ្នកស្នា់ក់នៅ បើដឹង
• ព័ត៌មានទំនាក់ទំនងលំអិតរបស់អ្នកស្នាក់នៅ និង
• បរិមាណប្រាក់ថ្លៃស្នាក់នៅ ។

ព័ត៌មានដែលយើងនឹងរក្សាទុកអំពីអ្នកស្នាក់នៅដែលមិនមែនជាអតិថិជនរបស់យើងខ្ញុំ

ប្រសិនបើអ្នកស្នាក់នៅរបស់អ្នក មិនមែនជាអតិថិជនរបស់យើងខ្ញុំ យើងខ្ញុំនឹងរក្សាទុកព័ត៌មាន​តិចតួចបំផុតអំពីពួកគេ ។ យើងខ្ញុំនឹងរក្សាទុកនូវឈ្មោះ អក្សរដំបូងនៃនាមត្រកូល  និងចំនួនទឹក​ប្រាក់ដែលពួកគេបង់ ។

ចំណុចនេះ គឺអាចជួយឱ្យអ្នកកាន់តែមានភាពងាយស្រួលក្នុងការធ្វើបច្ចុប្បន្នភាពសម្រាប់យើងខ្ញុំ អំពីអ្នកដែលរស់នៅក្នុងគ្រួសាររបស់អ្នក និងបរិមាណទឹកប្រាក់ដែលអ្នកទទួលបានពីពួកគេ  ។

យើង​ខ្ញុំនឹង​ពិនិត្យ​មើល​ថា​តើ​ចំនួន​ទឹកប្រាក់​ដែលបង់ដោយអ្នកស្នាក់នៅ ត្រូវគ្នាដែរឬទេ

ប្រសិន​បើអ្នកស្នាក់នៅក្នុងផ្ទះអ្នក ក៏បានទទួលប្រាក់ឧបត្ថម្ភសម្រាប់លំនៅដ្ឋានពីយើងខ្ញុំដែរនោះ យើងខ្ញុំនឹងពិនិត្យមើលថាតើបរិមាណទឹកប្រាក់ដែលអ្នកប្រកាស ត្រូវគ្នានឹងទឹកប្រាក់ដែល អ្នក​ស្នាក់​នៅក្នុងផ្ទះរបស់អ្នកបានប្រាប់យើងខ្ញុំដែរឬទេ ។

ប្រសិនបើចំនួនទឹកប្រាក់នេះមិនត្រូវគ្នាទេ យើងខ្ញុំអាចទាក់ទងអ្នក និងអ្នកដែលស្នាក់នៅក្នុងផ្ទះ​របស់អ្នក ដើម្បីបញ្ជាក់អំពីចំនួនដែលត្រឹមត្រូវ ។

ប្រសិនបើអ្នកបង់ប្រាក់ថ្លៃស្នាក់នៅ  ហើយចំនួនទឹកប្រាក់ថ្លៃស្នាក់នៅ ដែលអ្នកបានប្រាប់យើង​ខ្ញុំថា​អ្នកបានបង់ មានការផ្លាស់ប្តូរ ដោយសារតែការផ្គូផ្គងដែលយើងខ្ញុំបានធ្វើ គឺវាអាចប៉ះពាល់ដល់​បរិមាណទឹកប្រាក់ឧបត្ថម្ភគេហកិច្ចរបស់អ្នក ។

យើងខ្ញុំនឹងប្រាប់អ្នកឱ្យដឹងពីបរិមាណទឹកប្រាក់ជំនួយរបស់អ្នក ដែលអ្នកនឹងបានទទួល នៅ​ដើមឆ្នាំក្រោយ

ប្រសិនបើអ្នកទទួលបានប្រាក់ពីការបង់ថ្លៃស្នាក់នៅ យើងខ្ញុំនឹងពិនិត្យមើលទឹកប្រាក់នេះ  ហើយ​នឹង​ប្រាប់អ្នកឱ្យដឹងនៅក្នុងខែមករា/កុម្ភៈ 2026 ថាតើអត្រាជំនួយថ្មី ដែលអ្នកនឹងទទួលបានមាន​ចំនួន​ប៉ុន្មាន (ប្រសិនបើមានការផ្លាស់ប្តូរ) ។

ប្រាក់ដែលអ្នកបានទទួល នឹងមិនមានការផ្លាស់ប្តូរ រហូតដល់ខែមីនា ឆ្នាំ 2026 ។

យើងខ្ញុំ​នឹង​ធ្វើ​ការ​ផ្លាស់​ប្តូ​រ​ចំពោះ​ការ​បង់​ប្រាក់​ចាប់​ពី​ខែ​មីនា ឆ្នាំ 2026

បើអ្នកទទួលបានប្រា់ក់ពីការបង់ថ្លៃស្នាក់នៅ ៖

• អ្នកអាចទទួលបានប្រាក់ឧបត្ថម្ភគេហកិច្ច តិចជាងមុន ។ បើដូច្នេះមែន ស្ថានភាពនេះ​នឹង​ចូលជាធរមានចាប់ពីថ្ងៃទី 2 ខែមីនា ឆ្នាំ 2026 ។
• អ្នកអាចត្រូវបង់ ច្រើនជាងមុន ចំពោះប្រាក់ចំណូលពាក់ព័ន្ធនឹងការជួលផ្ទះ ។ បើដូច្នេះមែន ស្ថាន​ភាពនេះនឹងចូលជាធរមានបន្ទាប់ពីថ្ងៃទី 2 ខែមីនា ឆ្នាំ 2026 អាចថាចាប់ពីការពិនិត្យ​មើល​ឡើងវិញពីការជួលផ្ទះប្រចាំឆ្នាំបន្ទាប់របស់អ្នក ឬនៅពេលដែលស្ថានភាពរបស់អ្នក មានការផ្លាស់ប្តូរ ។

ហេតុអ្វីបានជាយើងខ្ញុំ ធ្វើការផ្លាស់ប្តូរទាំងនេះ

ការផ្លាស់ប្តូរនេះត្រូវបានប្រកាសជាផ្នែកនៃថវិកាឆ្នាំ 2024 ។ វាជួយកាត់បន្ថយលទ្ធភាពនៃការ​បង់ថ្លៃ MSD ចំពោះថ្លៃស្នាក់នៅដូចគ្នា ច្រើនជាងមួយដង ។ មានន័យថា ក្នុងករណីដែលអ្នកជួល (ឬម្ចាស់ផ្ទះ) និងអ្នកស្នាក់នៅជាមួយ សុទ្ធតែទទួលបានប្រាក់ឧបត្ថម្ភគកេហកិច្ច សម្រាប់ថ្លៃស្នាក់​នៅដូចគ្នា ។ 

ចំណុចនេះ ក៏មានគោលបំណងដោះស្រាយភាពមិនស្របគ្នារវាងវិធីដែលអនុវត្តចំពោះអ្នកជួល និងអ្នកស្នាក់នៅជាមួយ នៅពេលដែលយើងខ្ញុំគណនាថាតើអ្នកអាចទទួលបានប្រាក់ឧបត្ថម្ភ​គេហកិច្ចចំនួនប៉ុន្មាន និងថ្លៃជួលផ្ទះដែលអ្នកត្រូវបង់ ប្រសិនបើអ្នករស់នៅក្នុងលំនៅដ្ឋាន​សាធារណៈ 

សេចក្តីលំអិតអំពីការផ្លាស់ប្តូរទាំងនេះ

សូមជ្រើសរើសចំណងជើងដែលពាក់ព័ន្ធខាងក្រោម ដើម្បីស្វែងរកព័ត៌មានលម្អិតនៃការផ្លាស់ប្តូរ ។

ប្រាក់ឧបត្ថម្ភគេហកិច្ច

នៅពេលយើងខ្ញុំគណនាប្រាក់ឧបត្ថម្ភគេហកិច្ច  ចំណុចមួយដែលយើងខ្ញុំពិនិត្យមើល គឺថាតើអ្នក​ទទួល​បានប្រាក់ពីអ្នកស្នាក់នៅដែរឬទេ ។

បច្ចុប្បន្ននេះ យើងខ្ញុំដាក់បញ្ចូលតែ ប្រាក់ដែលអ្នកទទួលបានពីអ្នកស្នាក់នៅជាមួយចំនួន 3 នាក់ ឬ​ច្រើនជាងនេះ ក្នុងការគណនា (លើកលែងតែនេះ គឺជាប្រភពចំណូលចម្បងរបស់អ្នក) ។

ចាប់ពីថ្ងៃទី 2 ខែមីនា ឆ្នាំ 2026 តទៅ យើងខ្ញុំនឹងដាក់បញ្ចូល 62% នៃប្រាក់ដែលបានទទួលពីអ្នក​ស្នាក់​នៅ​ជាមួយ ទៅក្នុងរូបមន្តសម្រាប់ការគណនា (ប្រាក់ចំនួន 38% ផ្សេងទៀត មិនត្រូវបានរាប់​បញ្ចូលទេ ដោយយើងខ្ញុំយល់ថា វាជាថ្លៃអាហារ និងសេវាផ្សេងទៀត) ។ ត្រង់នេះមានន័យថា អ្នកអាចទទួលបានប្រាក់ឧបត្ថម្ភគេហកិច្ចតិចជាងមុន  ដោយសារយើងខ្ញុំទទួលស្គាល់ថា ប្រាក់​ដែលទទួលបានពីអ្នកស្នាក់នៅជាមួយ ជួយបង់ចំណាយសម្រាប់ថ្លៃស្នាក់នៅរបស់អ្នកខ្លះហើយ ។

ប្រាក់ឧបត្ថម្ភគេហកិច្ច រួមមាន ៖

• ប្រាក់បង្គ្រប់សម្រាប់ថ្លៃស្នាក់នៅ
• ជំនួយបន្ថែមបណ្តោះអាសន្ន
• អត្ថប្រយោជន៍ពិសេស
• អត្ថប្រយោជន៍ស្នាក់នៅ សម្រាប់និស្សិតដែលជាឪពុក/ម្តាយតែឯង និង
• ប្រាក់ជំនួយសម្រាប់ការរស់នៅឆ្ងាយពីផ្ទះ ។

ឧទាហរណ៍

Kingi កំពុងបង់ថ្លៃជួលផ្ទះចំនួន $600 ក្នុងមួយសប្តាហ៍ ។ គាត់មានអ្នកនៅជាមួយចំនួន 2 នាក់ ដែលកំពុងបង់ប្រាក់ឲ្យគាត់ចំនួន $150 និង $200 ក្នុងមួយសប្តាហ៍ ។

បច្ចុប្បន្ន យើងមិនបានដាក់បញ្ចូលប្រាក់ដែលបង់ដោយអ្នកស្នាក់នៅជាមួយ 2 នាក់ ដំបូងឡើយ នៅពេលវាយតម្លៃថ្លៃស្នាក់នៅរបស់គាត់ ។ ត្រង់នេះមានន័យថា គាត់ត្រូវបង់ថ្លៃស្នាក់នៅ $600  ។

ចាប់ពីថ្ងៃទី 2 ខែមីនា ឆ្នាំ 2026 តទៅ យើងនឹងយកប្រាក់ដែលបង់ដោយអ្នកស្នាក់នៅជាមួយ​ទាំងអស់ មកគិតបញ្ចូល ។

• យើងនឹងបូកនូវប្រាក់ដែលបង់ដោយអ្នកស្នាក់នៅជាមួយបញ្ចូលគ្នាទាំងអស់ ($150 + $200 = $350) ។
• យើងនឹងគណនាចំនួន 62% នៃប្រាក់សរុបដែលបង់ដោយអ្នកស្នាក់នៅជាមួយ ដែល​ស្មើ​នឹង 217 ដុល្លារ ។
• យើងនឹងដកចេញនូវថ្លៃស្នាក់នៅ ដោយប្រើចំនួននោះ (គឺ$600 ដក $217 នៅសល់ $383)
• ដូច្នេះ Kingi នឹងត្រូវបង់ប្រាក់ថ្លៃស្នាក់នៅ $383 ក្នុងមួយសប្តាហ៍ ។
• ដោយសារការចំណាយលើការស្នាក់នៅរបស់ Kingi បានថយចុះពី $600 ទៅ $383 គឺមាន​ន័យថា គាត់អាចនឹងទទួលបានប្រាក់ឧបត្ថម្ភគេហកិច្ច តិចជាងមុន ។

ការគណនាប្រាក់ចំណូលពាក់ព័ន្ធនឹងការជួលផ្ទះ

ដើម្បីគណនាប្រាក់ចំណូលរបស់អ្នក ទាក់ទងនឹងការជួលផ្ទះ (IRR) យើងខ្ញុំគណនាប្រាក់ចំណូល​គ្រួសារប្រចាំសប្តាហ៍របស់អ្នក ។ បច្ចុប្បន្ននេះ យើងចាត់ទុកតែប្រាក់ដែលទទួលពីអ្នកស្នាក់នៅជា​មួយ​ប៉ុណ្ណោះ ថាជាប្រាក់ចំណូល នៅពេលដែល ៖

• ប្រាក់ទាំងនោះ គឺជាប្រភពចំណូលចម្បងរបស់អ្នក (យើងប្រើចំនួនទឹកប្រាក់សរុបដែលអ្នក​ទទួលបានជារៀងរាល់សប្តាហ៍ ជាប្រាក់ចំណូលប្រចាំសប្តាហ៍របស់អ្នក) ឬ
• អ្នកទទួលបានប្រាក់ពីអ្នកស្នាក់នៅជាមួយចំនួន 3 នាក់ ឬច្រើនជាងនេះ (យើងខ្ញុំមិនដាក់​បញ្ចូល​ប្រាក់ខ្ពស់បំផុតដែលបង់ដោយអ្នកស្នាក់នៅជាមួយ ចំនួន 2 នាក់ ហើយប្រើតែចំនួន 62% ដើម្បីគណនាប្រាក់ចំណូលប្រចាំសប្តាហ៍សរុបរបស់អ្នក) ។

ការគណនាប្រាក់ជួលផ្ទះរបស់អ្នក

ចាប់ពីថ្ងៃទី 2 ខែមីនា ឆ្នាំ 2026 តទៅ យើងនឹងបញ្ចូលចំនួន 62% នៃប្រាក់ដែលអ្នកទទួលបានពី​អ្នក​ស្នាក់នៅ​ជាមួយទាំងអស់ហើយបូកចំនួននេះ នៅពេលគណនាចំនួនទឹកប្រាក់ IRR ដែលអ្នក​ត្រូវបង់ ។ ត្រង់នេះមានន័យថា អ្នកអាចបង់ប្រាក់ IRR ច្រើនជាងមុន ។

ប្រសិនបើចំនួនទឹកប្រាក់ IRR ដែលយើងខ្ញុំបានគណនាសម្រាប់អ្នក មានចំនួនច្រើនជាងតម្លៃជួល​ក្នុង​ទីផ្សារ​ពិតប្រាកដសម្រាប់អចលនទ្រព្យនោះ អ្នកនឹងត្រូវបង់តែចំនួនទឹកប្រាក់ទៅតាម​អត្រា​ទីផ្សារ​ប៉ុណ្ណោះ ។

រាល់ការផ្លាស់ប្តូរចំពោះប្រាក់ចំណូលរបស់អ្នកដែលទាក់ទងនឹងការជួល នឹងចូលជាធរមានបន្ទាប់​ពីថ្ងៃទី 2 ខែមីនា ឆ្នាំ 2026 អាចគិតពី ៖

• ការពិនិត្យមើលឡើងវិញនូវការជួលផ្ទះប្រចាំឆ្នាំបន្ទាប់របស់អ្នក ឬ
• នៅពេលដែលកាលៈទេសៈរបស់អ្នកមានការផ្លាស់ប្តូរ ។

ឧទាហរណ៍ ចាប់ពីថ្ងៃទី 2 ខែមីនា ឆ្នាំ 2026

Vanessa កំពុងរស់នៅក្នុងលំនៅដ្ឋានសាធារណៈ ហើយបង់ IRR ចំនួន $400 ក្នុងមួយសប្តាហ៍ ។ គាត់​មានអ្នកនៅជាមួយចំនួន 2 នាក់ ដែលបង់ប្រាក់ឲ្យគាត់ចំនួន $150 និង $200 ក្នុងមួយសប្តាហ៍

ដូច្នេះចាប់ពីថ្ងៃទី 2 ខែមីនា ឆ្នាំ 2026 យើងនឹង ៖

• បូកប្រាក់ដែលបង់ដោយអ្នកស្នាក់នៅជាមួយបញ្ចូលគ្នា ($150 + $250 = $400) និង
• គណនាចំនួន 62% នៃប្រាក់សរុបដែលបង់ដោយអ្នកស្នាក់នៅជាមួយ ដែលស្មើនឹង $248

បន្ទាប់មកយើងខ្ញុំនឹងបូកចំនួននេះទៅក្នុងការគណនាប្រាក់ចំណូលដែលទាក់ទងនឹងការជួលផ្ទះ របស់​គាត់ ។ ត្រង់នេះមានន័យថា ចំនួន IRR របស់គាត់នឹងកើនពី $400 ទៅ $648 ។

ប្រសិនបើចំនួនទឹកប្រាក់ IRR ដែលត្រូវបង់ មានចំនួនច្រើនជាងតម្លៃជួលក្នុងទីផ្សារពិតប្រាកដ​សម្រាប់អចលនទ្រព្យនោះ គឺគាត់នឹងត្រូវបង់តែចំនួនទឹកប្រាក់ទៅតាមអត្រាទីផ្សារប៉ុណ្ណោះ ។

នៅពេលដែលប្រាក់ដែលអ្នកទទួលបានពីអ្នកស្នាក់នៅជាមួយ ត្រូវរាប់ជាប្រាក់ចំណូល

មាន​ពេលខ្លះដែលប្រាក់មួយចំនួនដែលអ្នកទទួលបានពីអ្នកស្នាក់នៅជាមួយ អាចត្រូវរាប់ជាប្រាក់​ចំណូល​សម្រាប់ការទូទាត់ភាគច្រើនដែលអ្នកទទួលបានពីយើងខ្ញុំ ។

អាចថា 62% នៃចំនួនសរុបដែលអ្នកបានទទួលពីអ្នកស្នាក់នៅជាមួយ គឺច្រើនជាងតម្លៃស្នាក់នៅ​របស់អ្នក ។ ក្នុងករណីនេះ ចំនួនទឹកប្រាក់លើសនឹងត្រូវរាប់ជាប្រាក់ចំណូលសម្រាប់ការទូទាត់ភាគ​ច្រើនដែល​អ្នកទទួលបានពីយើងខ្ញុំ លើកលែងតែអ្នករស់នៅក្នុងលំនៅដ្ឋានសាធារណៈ ។

ប្រសិនបើអ្នកកំពុងរស់នៅក្នុងលំនៅដ្ឋានសាធារណៈ យើងខ្ញុំនឹងឆែកមើលថាតើ 62% នៃចំនួន​សរុប​នៃ​ប្រាក់​ដែលអ្នកទទួលបានពីអ្នកស្នាក់នៅជាមួយ មានចំនួនច្រើនជាងតម្លៃជួលតាមទីផ្សារ​សម្រាប់​អចលនទ្រព្យនោះដែរឬទេ ។ ក្នុងករណីនេះ ចំនួនទឹកប្រាក់លើសនឹងត្រូវរាប់ជាប្រាក់​ចំណូល​សម្រាប់ការ​ទូទាត់​ភាគច្រើនដែលអ្នកទទួលបានពីយើងខ្ញុំ  ។

ឧទាហរណ៍ - មិនរស់នៅក្នុងលំនៅដ្ឋានសាធារណៈ

តម្លៃស្នាក់នៅរបស់អ្នកគឺ $300 ក្នុងមួយសប្តាហ៍ ។ អ្នកមាន មនុស្សរស់នៅជាមួយចំនួន 2 នាក់ ហើយ​ទទួលបានប្រាក់សរុបពីអ្នករស់នៅជាមួយចំនួន $600 ក្នុងមួយសប្តាហ៍ ។ 62% នៃប្រាក់​សរុប​​ដែល​អ្នក​ទទួលបានពីអ្នករស់នៅជាមួយគឺ  $372 ។ ចំនួនទឹកប្រាក់លើសពីថ្លៃស្នាក់នៅគឺ $72

ត្រង់នេះមានន័យថា ទឹកប្រាក់ចំនួន $72 ត្រូវរាប់ជាប្រាក់ចំណូលសម្រាប់ការទូទាត់ភាគច្រើនដែល​អ្នកទទួលបានពីយើងខ្ញុំ ។

ឧទាហរណ៍ - រស់នៅក្នុងលំនៅដ្ឋានសាធារណៈ

អ្នកកំពុងរស់នៅក្នុងលំនៅដ្ឋានសាធារណៈ ហើយតម្លៃទីផ្សារសម្រាប់ការជួលអចលនទ្រព្យ​របស់​អ្នកគឺ $500 ក្នុងមួយសប្តាហ៍ ។ អ្នកមាន មនុស្សរស់នៅជាមួយចំនួន  3  នាក់ ហើយទទួលបាន​ប្រាក់​សរុប​ពីអ្នករស់នៅជាមួយចំនួន $900 ក្នុងមួយសប្តាហ៍ ។ 62% នៃប្រាក់សរុបដែលអ្នកទទួល​បាន​ពីអ្នករស់នៅជាមួយគឺ  $558 ។ ចំនួនទឹកប្រាក់លើសពីថ្លៃស្នាក់នៅគឺ $58 ។

ត្រង់នេះមានន័យថា ទឹកប្រាក់ចំនួន $58 ត្រូវរាប់ជាប្រាក់ចំណូលសម្រាប់ការទូទាត់ភាគច្រើន​ដែល​អ្នកទទួលបានពីយើងខ្ញុំ ។